နောက်ခံသမိုင်း
ကျောက်မျက်ရတနာရောင်းဝယ်ရေးလုပ်ငန်းများဆောင်ရွက်နိုင်ရန် ပြည်ထောင်စုမြန်မာ နိုင်ငံတော် တော်လှန်ရေးအစိုးရကုန်သွယ်ရေးဌာန၏ ၁၉၆၅ ခုနှစ်၊ ဒီဇင်ဘာလ(၂၀)ရက်နေ့ ရက်စွဲပါ အမိန့်ကြော်ငြာစာအမှတ်(၃)အရ ကုန်သွယ်ရေးကော်ပိုရေးရှင်း အမှတ်-၁၉ (ကျောက်မျက်ရတနာ) အား ၁၉၆၆ ခုနှစ်၊ ဇန်နဝါရီလ (၁)ရက်နေ့တွင် စတင်ဖွဲ့စည်း တည်ထောင်ခဲ့ပါသည်။ (၁.၄.၁၉၇၆) ရက်နေ့တွင် ကုန်သွယ်ရေး(၁၉)နှင့် မြန်မာ့ဓာတ်သတ္တု တိုးချဲ့လုပ်ကိုင်ရေးကော်ပိုရေးရှင်း၏ ကျောက်မျက်ရတနာစီမံကိန်းနှင့် ကျောက်စိမ်းတွင်း စီမံကိန်းတို့ ပူးပေါင်းပြီး သတ္တုတွင်းဝန်ကြီးဌာန လက်အောက်တွင် မြန်မာ့ကျောက်မျက်ရတနာ ကော်ပိုရေးရှင်းကို ဖွဲ့စည်းခဲ့ပါသည်။ (၁.၄.၁၉၈၉) ရက်နေ့မှစ၍ မြန်မာ့ကျောက်မျက် ရတနာရောင်း၀ယ်ရေးလုပ်ငန်းဟု ပြောင်းလဲခေါ်ဝေါ် သတ်မှတ်ခဲ့ ပါသည်။
လုပ်ငန်းတာဝန်များ
မြန်မာ့ကျောက်မျက်ရတနာရောင်းဝယ်ရေးလုပ်ငန်းအနေဖြင့် လက်ရှိ အဓိကထမ်းဆောင် နေသော လုပ်ငန်းတာဝန်များမှာ အောက်ပါအတိုင်းဖြစ်ပါသည် –
(၁) ရတနာနယ်မြေအလိုက် ကျောက်စိမ်း၊ ကျောက်မျက်တူးဖော်ထုတ်လုပ်မှုနှင့် သဘာဝ ပတ်ဝန်းကျင်ထိန်းသိမ်းရေးလုပ်ငန်းများကို ကြီးကြပ်ဆောင်ရွက်ခြင်း၊
(၂) ရတနာနယ်မြေအတွင်းနှင့် ရတနာနယ်မြေပြင်ပတွင် ကျောက်စိမ်း၊ ကျောက်မျက်များ တူးဖော်ရန် အလတ်စားလုပ်ကွက်များ ချထားပေးနိုင်ရေး စိစစ်တင်ပြခြင်း၊
(၃) ထုတ်လုပ်မှုအပေါ် ခွဲဝေခံစားသည့်စနစ်ဖြင့် ပြည်တွင်းနိုင်ငံသားလုပ်ငန်းရှင်များက ကျောက်စိမ်း၊ ကျောက်မျက်ရတနာတူးဖော်ထုတ်လုပ်ခြင်း၊
(၄) မြန်မာ့ကျောက်မျက်ရတနာဥပဒေနှင့်အညီ တူးဖော်ရရှိသည့် ကျောက်စိမ်း၊ ကျောက်မျက် များအပေါ် ရတနာခွန် (တွင်းဝခွန်)များ ရရှိရေးအတွက် ကြီးကြပ်ဆောင်ရွက်ခြင်း၊
(၅) ပုဂ္ဂလိက ကျောက်မျက်ရတနာဆိုင်များကို ကျောက်မျက်ရတနာများရောင်းချခြင်း လုပ်ငန်းအား လုပ်ကိုင်နိုင်ရန် လိုင်စင်များစိစစ်ချထားပေးခြင်း၊
(၆) အထူးရွှေဆိုင်များဖွင့်လှစ်၍ မြန်မာနိုင်ငံတော်ဗဟိုဘဏ်က အပ်နှံသော ရွှေဒင်္ဂါးပြားနှင့် ရွှေစင်ချောင်းများ ရောင်းချခြင်း၊
(၇) ကျောက်မျက်ရတနာပြတိုက်များဖွင့်လှစ်ပြီး စီမံကိန်းထိန်းသိမ်းကွပ်ကဲခြင်း၊
(၈) ပြတိုက်အဆောက်အအုံတွင် ရတနာဈေးဖွင့်လှစ်၍ ပုဂ္ဂလိကရတနာဆိုင်များအား ကြီးကြပ်ကွပ်ကဲခြင်း၊
(၉) ကျောက်မျက်ရတနာပြပွဲများကျင်းပပြီး ကျောက်စိမ်း၊ ကျောက်မျက်များကို ခင်းကျင်း ပြသရောင်းချခြင်း၊
(၁၀) ပြည်ထောင်စုဝန်ကြီးဌာနက ကြီးမှူးကျင်းပသော ရတနာပြပွဲများတွင် နိုင်ငံခြား ငွေဖြင့်ရောင်းချရသည့် ကျောက်စိမ်း၊ ကျောက်မျက်များကို နိုင်ငံခြားသို့တင်ပို့ခြင်း၊
(၁၁) ကျောက်မျက်ရတနာများ ပြည်ပသို့ တရားမဝင်သယ်ဆောင်မှု လျော့နည်းပပျောက် စေရန် (One Stop Service Centre) များ ဖွင့်လှစ်၍ တရားဝင်တင်ပို့နိုင်ရေး ဆောင်ရွက်ခြင်း၊ နောင်တွင် (Gems Trading Centre) များ ဖွင့်လှစ်နိုင်ရေး ဆောင်ရွက်လျက်ရှိခြင်း။
ဆက်သွယ်ရန်လိပ်စာနှင့်ဖုန်းနံပါတ်
မြန်မာ့ကျောက်မျက်ရတနာရောင်းဝယ်ရေးလုပ်ငန်း၊ ရာဇသင်္ဂဟလမ်း၊ မြန်မာ့ကျောက်မျက်ရတနာ ပြတိုက်၊ နေပြည်တော်။
ဖုန်း – ၀၆၇-၄၁၄၃၄၆